allegro

Skólaárið hafið

Thu, 05 Sep 2024 14:24:39 GMT

Skólaárið er hafið

Nýtt skólaár hófst í Allegro 26.ágúst. Að venju förum við af stað með trukki. Fyrstu hóptímar vetrarins voru laugardaginn 31.ágúst og sama dag voru fyrstu laugardagstónleikarnir haldnir. 12 nemendur voru tilbúnir að spila á tónleikum og verður það að teljast vel af sér vikið í fyrstu skólaviku vetrarins. Þessir nemendur voru búnir að taka þátt í sumarnámskeiðum í sumar ásamt því að hafa verið mjög dugleg að æfa sig í sumarfríinu. Það var skemmtileg tilviljun að fimm pör af systkinum komu fram á tónleikunum.

Í byrjun skólaárs hafa orðið breytingar á stjórnun skólans. Gróa Margrét tekur við sem skólastjóri og Anela verður aðstoðarskólastjóri. Við munum halda áfram að starfa í þeim góða anda sem Kristinn og Lilja hafa byggt upp í skólanum í gegnum árin og sem betur fer fáum við áfram að njóta þess að hafa þau í kennaraliðinu okkar.

Litið um öxl og fram á veg

Sun, 11 Aug 2024 16:30:58 GMT

Allegro átti 25 ára afmæli síðasta haust, lítið var gert til að halda upp á afmælið, enda mikill sparnaður í gangi, en þó komu kennarar þeim Kristni og Lilju á óvart með smá afmælisuppákomu! Þess má einnig geta að grein um skólann birtist í Morgunblaðinu sem gaman er að vitna til með fyrirsögninni: „Gefum ekki afslátt af vandvirkni“ og undirtitlar greinarinnar voru: • Allegro Suzuki-tónlistarskólinn fagnar 25 ára afmæli • Nemendur víða í tónlistarlífinu • Móðurmálsaðferð Suzuki • Heimilislegur tónlistarskóli og foreldrar hafa hlutverk • Langir biðlistar.

Starfið fór fram með hefðbundnum hætti, 79 nemendur stunduðu nám, útskriftir, tónleikar og próf gengu vel fyrir sig og óvenju margir nemendur luku áfangaprófum þetta árið og meðaleinkunn var yfir níu. Meðal viðburða skólaársins má nefna að Allegro þátt í klassíska krakkadeginum í Hörpu þann 20. apríl með samleiks atriðum og einleik bæði píanóleikara og fiðluleikara. Tríó þriggja ungmenna í Allegro, þeirra Sveindísar, Sólar og Sigrúnar sem leika á fiðlu, víólu og píanó, voru fulltrúar skólans á svæðistónleikum Nótunnar sem haldin var í Salnum í Kópavogi. Þau komu líka fram á athöfn við styrkveitingar barnamenningarsjóðs í Þjóðmenningarhúsinu 26. mars.

Það hefur verið gaman að fylgjast með fyrrum nemendum Allegro. Á tónleikum Menntaskóla í tónlist þann 9. mars í Neskirkju komu fram sem einleikarar Ásta Dóra Finnsdóttir á píanó og Austin Ching Yu á fiðlu. Hljómsveitinni stjórnaði Ragnheiður Ingunn Jóhannsdóttir. Allir þessir öflugu einstaklingar lærðu í Allegro á sínum tíma. Ásta Dóra hélt líka opinbera einleikstónleika í Salnum í Kópavogi nú í júni.

Einn af sigurvegurum keppninnar „Ungir einleikar“ hjá Sinfóníuhljómsveit Íslands 2024 var Helga Diljá Jörundsdóttir, fiðluleikari sem er fyrrum nemandi í Allegro. Þrír fyrrum nemendur Allegro útskrifuðust frá Menntaskóla í tónlist í vor, þau Mímir Mixa píanóleikari, Margrét Lára Jónsdóttir fiðluleikari og Austin Ching Yu Ng fiðluleikari.

Hollvinafélag Allegro hélt aðalfund í vor en eitt af markmiðum þess er einmitt að efla tengsl skólans við fyrrum nemendur og foreldra. Stjórn þess skipa nú Guðfríður Lilja Grétarsdóttir, Arndís Bergsdóttir, Steinþór Sigurðsson, Finnur Kristinsson og Þórunn Elín Pétursdóttir.

Nú í haust verða þær breytingar að Kristinn Örn lætur af störfum skólastjóra (heldur áfram kennslu) en Gróa Margrét Valdimarsdóttir tekur við og henni til aðstoðar verður Anela Bakraqi. Helga Steinunn lætur af störfum við skólann og færum við henni bestu þakkir fyrir vel unnin störf. Sigrún Harðardóttir kemur inn í stærra hlutfall sem fiðlukennari.

Áttatíu og sex nemendur hafa verið innritaðir til náms á haustönn 2024. Langir biðlistar eru við skólann og sárt að geta ekki sinnt þeim stóra hópi. Sótt hefur verið um aukið fjármagn til skólans frá Reykjavíkurborg en formlegt svar hefur ekki borist er þetta er ritað.

Við upphaf nýs skólaárs!

Mon, 04 Sep 2023 17:57:56 GMT

Um leið og við gleðjumst yfir að þessi litli skóli okkar skuli hafa skilað svo drjúgum ávöxtum erum við um leið hugsi yfir að Reykjavíkurborg hyggist ekki lengur styrkja tónlistarskóla nema þeir hafi minnst 150 nemendur. Allegro Suzukitónlistarskóli hefur lengst af verið með 80-90 nemendur. Þetta hefur reyndar lengi verið á stefnuskránni hjá borginni, en undanþágur hafa verið veittar. Nú virðist borgin ætla að herða að og vonast til að skólar sameinist. Með því vonast þeir til að stjórnunarkostnaður sparist og meiri peningur fari í kennslu. Við höfum takmarkaða trú á því.

Lokatónleikar Allegro 2023

Fri, 02 Jun 2023 16:47:59 GMT

Lokatónleikar Allegro vorið 2023 voru haldnir í Langholtskirkju 1. júní kl. 17:30. Allir hljóðfærahópar skólans komu fram í samleik og fluttu fjölbreytta efnisskrá.

Suzuki Gala tónleikar í Royal Albert Hall í London

Wed, 12 Apr 2023 22:58:28 GMT

R'umlega 1300 börn og ungmenni allt frá fimm ára aldri tóku þátt í hátíðatónleikum Breska Suzukisambandsins nú um páskana. Þau voru frá um 30 mismunandi þjóðlöndum, eða eins og sagt var, allt frá Íslandi til Vietnam, frá Argentinu til Zimbabwe! Þar af var dágóður hópur frá Íslandi og þó nokkrir nemendur úr Allegro, bæði á fiðlur, víólu og píanó. Tveir af kennurum skólans þau Lilja og Kristinn Örn nutu þess heiðurs að fá að stjórna atriðum á tónleikunum og einnig voru kennarar frá Allegro að aðstoða við framkvæmd tónleikanna. Viðstaddir höfðu sterk lýsingarorð um tónleikana - "heimsviðburður", "ógleymanlegir tónleikar", "algerlega magnaðir", "Undirbúningur kennara, samhugur og samvinna allra sem að komu skapaði kraftaverk, 1300 börn allt frá fimm ára sem léku með ótrúlegri samhæfingu og samhljómi sem hrærði hjörtu viðstaddra!"

Allegro tók þátt í Nótunni 2023

Wed, 12 Apr 2023 22:34:40 GMT

Nótan er uppskeruhátíð tónlistarskólanna en hún var að þessu sinni haldin í Eldborgarsal Hörpu þann 19. mars síðastliðinn. Framlag Allegro var fiðluhópur sem lék Gavottu eftir Lully ásamt píanóleikurum sem léku á slagverk og fjórhent píanó. Einnig tóku nokkrir nemendur úr Allegro þátt í tónsmiðju undir stjórn Sigrúnar Sævarsdóttur-Griffits, þar sem 140 tónlistarnemendur tóku þátt í að semja tónverkið "Óður til tónlistarinnar" sem síðan var flutt á lokatónleikum hátíðarinnar. Einnig fluttu tveir nemendur úr Allegro konsert kafla í Hörpuhorni. Alls komu fram hátt í 500 tónlistarnemar þennan dag og er það öflugur vitnisburður um hið mikla starf tónlistarskólanna sem ekki fer alltaf mikið fyrir.

Viðburðaríkir mánuðir að baki

Wed, 12 Apr 2023 13:14:25 GMT

Margir viðburðir eru að baki, má þar nefna uppbrot í febrúar, kammerviku 20.-25. mars, Nótuna í Hörpu 19. mars og hljómsveitartónleika í Allegro 28. mars.

Útskriftir úr bókum / Námskeið í sumar

Tue, 07 Feb 2023 21:36:23 GMT

Útskriftir úr bókum

Nú er búið að setja upplýsingar um útskriftir úr bókum á heimasíðuna inni á mínum síðum. Þar eru upplýsingar um ferlið og hvernig útskriftir fara fram. Til dæmis hve langt nemendur þurfa að vera komnir, úr hverju er dregið, hver eru útskriftarlögin og þar fram eftir götunum. Kennarar lögðu vinnu í að samræma kröfur og varpa skýrara ljósi á til hvers er ætlast.

Eitt af því sem vert er að hafa í huga er að útskriftir ganga mun auðveldar fyrir sig ef allir eru duglegir að rifja upp og upprifjun er hluti af daglegri rútínu.

Nú er tíminn til að huga að sumarnámskeiðum!

Upprifjun - endurnýjun

Tue, 31 Jan 2023 22:23:37 GMT

Það var gaman að heyra fiðlunemendur leika gömul endurunnin lög á örtónleikum síðasta hóptímadag og píanónemendur í eldri hópum leika fyrir yngri nemendur.

Við höldum áfram að vinna með upprifjun og mánudag og þriðjudag fyrir vetrarfríið í febrúar verður svokallað uppbrot. Þá munum við áfram vinna í hópum með upprifjun sem aðalmarkmið. Þá er markmiðið ekki bara að geta spilað gömlu lögin heldur geta leikið þau sífellt betur og betur, hlusta eftir tóni og túlkun, hendingum og tilfinningum! Nánari upplýsingar um fyrirkomulagið kemur von bráðar!

Til að halda gömlu lögunum við má nota gamla ráðið að setja nöfnin á lögunum í krukku og draga nokkur lög dag hvern til að hita upp. Þeir sem vilja nýta sér tæknina geta náð í öpp á borði við "spin wheel" eða "decision roulette" til að gera upprifjunina meira spennandi. Það er líka til íslenskt app fyrir píanónemendur, "Píanóæfingar - Upprifjun" sem Berglind Rós Guðmundsdóttir hefur búið til.

Hlustun - samkvæmt Suzuki aðferðinni!

Tue, 03 Jan 2023 21:13:32 GMT

Kraftur endurtekinnar hlustunar

Jólatónleikar Allegro

Tue, 06 Dec 2022 13:00:09 GMT

Jólatónleikar Allegro verða laugardaginn 10. desember í sal Fóstbræðra

Ánægjulegir tónleikar

Mon, 28 Nov 2022 22:11:12 GMT

Það var mikil stemning og eftirvænting í lofti þegar fimm ungir einleikarar stigu á stokk og léku einleik með Sinfóníuhljómsveit áhugamanna

Ungir og efnilegir einleikarar!

Thu, 17 Nov 2022 19:28:04 GMT

SInfóníuhljómsveit áhugamanna heldur tónleika í Seltjarnarneskirkju þann 26. nóvember kl. 16:00 þar sem fram koma ungir einleikarar og leika einleik með hljómsveitinni. Á meðal þeirra er Haraldur Áss Liljuson sem er fiðlunemandi í Allegro og einnig Margrét Lára Jónsdóttir sem er fyrrum nemandi við Allegro. Tónleikarnir eru haldnir í samvinnu við Nótuna 2022, uppskeruhátíð tónlistarskólanna. Þetta verða skemmtilegir tónleikar, hvetjum sem flest til að mæta!

Tónfræðin í Allegro

Wed, 16 Nov 2022 22:22:56 GMT

Popp og rokk.

Í september og október kynntum við okkur nokkrar súperstjörnur í popp- og rokkheiminum. Við unnum fjölbreytt verkefni og hlustuðum á Queen, Elvis Presley, Bítlana og Harry Styles. Það var mjög erfitt að velja ;)

Eftir áramótin kynnumst við svo Tina Turner, Dolly Parton, Beyoncé og Adele :)

-Hópar 4 og 5 unnu klippimyndir og teikningar.

-Hópar 1, 2 og 3 lituðu Bítlamynd

Pétur og úlfurinn

Hópur 1 vann verkefni um Pétur og úlfinn í nóvember. Þau lærðu um hljóðfærin, bæði í sjón og eftir heyrn.

Þessa dagana erum við að skapa hljóðverk út frá:

-hryndæmun

-do re mí

-hljóðhreyfingum

-orðum (söguteningum)

Vigdís

Öðruvísi hóptímar!

Sat, 29 Oct 2022 21:57:39 GMT

Öðru vísi hóptímar.

Laugardaginn 29. október var uppbrot á hefðbundnum hóptímum og áhersla lögð á upprifjun. Fiðlunemendur voru allir saman í stóra salnum og léku lög úr bókum 1-4. Síðan voru einnig örtónleikar þar sem nemendur úr efri bókum léku lög úr neðri bókum. Píanóhópum var skipt upp í smærri hópa og þar komu gestir úr eldri hópum til að leika með yngri hópum. Bæði léku gestirnir hljómameðleik með lögum úr bók eitt en einnig sóló bæði úr bók 1 og 2 og sömuleiðis efri bókum. Þar sem hrekkjavaka var á næsta leiti máttu nemendur mæta í búningum og nýttu sumir sér það tækifæri svo sannarlega! Að lokum voru laugardagstónleikarnir á sínum stað og foreldrafélagið sá um kaffi og meðlæti eins og venjulega á laugardögum!

Öðruvísi hóptímar

Sat, 29 Oct 2022 21:36:47 GMT

Öðru vísi hóptímar.

Nýtt í bókasafni foreldra!

Wed, 26 Oct 2022 16:00:39 GMT

Nú hefur bæst í bókasafn foreldra lítið kver sem heitir " Positive Practice - 5 Steps to Help your Child Develop a Love of Music". Það er ritað af Christine Goodner sem hefur mikla reynslu mikla reynslu, bæði sem Suzuki kennari, en líka sem Suzuki foreldri. Hún hefur líka skrifað bókina "Beyond the Music Lesson, Habits of Successful Suzuki Families" sem mér finnst frábær bók og þyrfti að bætast við safnið.

Strengjasveitarmót á Selfossi

Wed, 19 Oct 2022 00:38:59 GMT

Helgina 7.-9. október fór fram Strengjasveitarmót á Selfossi. Allegro átti 15 fulltrúa á mótinu, 4 í gulu og 11 í rauðu sveitinni. Mótið átti að standa yfir frá föstudagseftirmiðdegi til sunnudags en vegna slæmrar veðurspár var lokatónleikunum flýtt um einn dag og námskeiðið klárað á laugardagskvöldi. Það þurfti því að æfa mjög mikið á laugardeginum en nemendurnir stóðu sig allir mjög vel og voru skólanum til sóma.

Hápunktur námskeiðisins að mati krakkanna var hins vegar pitsuveislan og diskótekið að loknum tónleikum. Svo héldu allir glaðir en þreyttir heim eftir skemmtilega helgi.

Allegro Suzukitónlistarskóli tilnefndur til Íslensku Menntaverðlaunanna

Tue, 11 Oct 2022 20:02:28 GMT

Tilnefningar til íslensku menntaverðlaunanna 2022 voru kynntar í tilefni alþjóðlega kennaradagsins 5. október. Verðlaunin verða svo veitt við hátíðlega athöfn á Bessastöðum 2. nóvember. Allegro Suzukitónlistarskóli var tilnefndur fyrir einstakan metnað og árangur í tónlistarstarfi.

Í umsögn segir meðal annars:

" Nemendur Allegro fá gott veganesti út í lífið, t.d. að læra að það geta allir náð takmarki sínu ef unnið er stöðugt að því og það skilar sér í allt sem nemendurnir taka sér fyrir hendur seinna á lífsleiðinni. Það er ekki markmið skólans að allir nemendur verði atvinnutónlistarfólk en lögð áhersla á góðan grunn ef þau skyldu kjósa það."

"Metnaður og virðing, ásamt hlýju og kærleika eru mikilvæg gildi í starfi Allegro. Allegro er lítill skóli og því vel haldið utan um nemendur, kennslan er persónuleg og engin/nn týnist í fjöldanum."

Hér má lesa meira um tilnefningarnar .

Ný heimasíða lítur dagsins ljós

Mon, 26 Sep 2022 21:16:04 GMT

Ný heimasíða er hér komin í loftið. Grunninn að síðunni og aðstoð við gerð hennar sá frændi Lilju um, en hann heitir Egill Vignisson og fyrirtækið hans er beisik.is og eru honum færðar bestu þakkir fyrir.

Ein helsta nýjungin er að nú eru sérstakar "mínar síður" þar sem forráðamenn skrá sig inn og þar er ýmsar upplýsingar sem sérstaklega er ætlaðar foreldrum í skólanum.

Íslendingar í Bryanston

kristinn@allegro.is (Kristinn Örn Kristinsson) — Tue, 13 Sep 2022 22:00:07 GMT

Bryanston 2022 og fyrstu laugardagstónleikar vetrarins

Dágóður hópur nemenda úr Allegro bæði á fiðlu og píanó fór á námskeið í Bryanston á Englandi nú síðla ágústmánaðar. Mjög stór hópur íslendinga var mættur á staðinn svo sem sjá má á myndinni. Nemendur stóðu sig með prýði og voru okkur öllum til sóma. Lilja og Kristinn Örn voru þar bæði að kenna í hópi frábærra kollega víða að, en þetta námskeið er eitt hið stærsta sinnar tegundar í Evrópu. Ekki þarf að fjölyrða um hvetjandi áhrif þess að vera í slíku tónlistarumhverfi í góðum félagsskap frá morgni til kvölds í heila viku!

Fyrstu laugardagstónleikar vetrarins

Fyrstu laugardagstónleikar vetrarins verða hóptímadaginn 10. september og þar munu einkum koma fram nemendur skólans sem eru vel heitir og tilbúnir eftir Bryanston námskeiðið. en einnig nemendur sem fóru á námskeið í Dublin.

Skólabyrjun

kristinn@allegro.is (Kristinn Örn Kristinsson) — Fri, 05 Aug 2022 00:26:11 GMT

Vonandi hafið þið haft það gott í sumarfríinu! Nú þarf að fara að koma sér í gírinn! Þeir sem vita hjá hvaða kennurum þeir verða mega senda þeim stundatöflur um leið og þær liggja fyrr svo þeir geti farið að raða niður tímum. Kennsla hefst svo samkvæmt stundaskrá 29. ágúst og fyrstu hóptímar vetrarins verða laugardaginn 10. september.

Verðlaun

Sun, 07 Nov 2021 07:15:11 GMT

Það er gaman að segja frá því að Kristín Gyða nemandi Brynhildar hlaut fyrstu verðlaun í yngsta flokki, 10 ára og yngri, í 8. píanókeppni Evrópufélags píanókennara (EPTA) á Íslandi nú um helgina. Ásta Dóra, fyrrverandi nemandi í Allegro hlaut fyrstu verðlaun í flokki 18 ára og yngri. Óskum við öllum hlutaðeigandi vinningshöfum, kennurum þeirra og fjölskyldum til hamingju!

Viðburðir

Mon, 01 Nov 2021 07:09:39 GMT

Við brýnum fyrir foreldrum að fylgjast vel með skóladagatalinu, eitthvað var um að nemendur vantaði í hóptíma síðustu helgi án þess að boð um forföll skiluðu sér! Forföll á að senda á viðkomandi hóptímakennara; öll símanúmer og netföng er að finna á heimasíðu skólans.

Hlustun og tónleikar!

Grundvöllur góðs árangurs í Suzuki námi er hlustun. Þá erum við ekki að tala um vikulega hlustun, heldur daglega hlustun, þétta hlustun og síendurtekna. Þeir sem hafa einu sinni áttað sig á hve mikum árangri þetta skilar gleyma því ekki!

Það er líka hluti af tónlistaruppeldi okkar að fara og hlusta á tónleika, njóta tónlistar. Við viljum vekja athygli á nokkrum tónleikaviðburðum af þessu tilefni.

Bestu kveðjur
Skólastjórnendur

Hóptímar

Thu, 12 Nov 2020 07:19:32 GMT

Kæru foreldrar! Hóptímar og tónleikar verða á morgun laugardaginn 13. nóvember, samkvæmt áætlun. Píanóhóptímar 1, 2 og 4 falla þó niður vegna veikinda, en verða þess í stað viku síðar. Allir hlutaðeigandi eiga að hafa fengið póst um það.

Vegna stöðu covid mála munum við að sjálfsögðu fara varlega, grímur eru skylda þar sem ekki er hægt að koma við eins metra fjarlægð, og best er að ekki komi fleiri en eitt foreldri með hverju barni í hóptíma. Spörum heldur ekki sprittið og sápuna!

Bestu kveðjur

allegro

Skólaárið hafið

Skólaárið er hafið

Litið um öxl og fram á veg

Við upphaf nýs skólaárs!

Lokatónleikar Allegro 2023

Suzuki Gala tónleikar í Royal Albert Hall í London

Allegro tók þátt í Nótunni 2023

Viðburðaríkir mánuðir að baki

Útskriftir úr bókum / Námskeið í sumar

Útskriftir úr bókum

Nú er tíminn til að huga að sumarnámskeiðum!

Upprifjun - endurnýjun

Hlustun - samkvæmt Suzuki aðferðinni!

Kraftur endurtekinnar hlustunar

Jólatónleikar Allegro

Ánægjulegir tónleikar

Ungir og efnilegir einleikarar!

Tónfræðin í Allegro

Öðruvísi hóptímar!

Öðru vísi hóptímar.

Öðruvísi hóptímar

Öðru vísi hóptímar.

Nýtt í bókasafni foreldra!

Strengjasveitarmót á Selfossi

Allegro Suzukitónlistarskóli tilnefndur til Íslensku Menntaverðlaunanna

Ný heimasíða lítur dagsins ljós

Íslendingar í Bryanston

Skólabyrjun

Verðlaun

Viðburðir

Hóptímar

Skólastjóri